الفرق بين الحجز التحفظى والحجز التنفيذى

المقصود بالحجز التحفظى والحجز التنفيذى والحجز الإدارى

أولا : المقصود بالحجز التحفظى : –

بيكون بناء على طلب الدائن بوضع اموال المدين تحت يد القضاء بسبب خوفه وخشيته من ان المدين يتصرف فى الاموال دى ويضيع عليه حقه او المدين يخبيها لتاخير الاجراءات فى القضيه المعروضه … ودى وسيله قانونيه للمحافظه على اموال الدائن والحجز على امواله لدى المدين … ودى بالبلدى كده زى مابيقولو اللى هو بيضمن حقه لحد مالقضيه يتم الفصل فيها .

لايجوز عمل الحجز التحفظى الا على منقول يعنى الحاجات اللى ممكن تتنقل من مكان الى مكان اخر زى الفلوس والبضايع والعفش والكلام ده انما يعنى من المنطق مينفعش حجز تحفظى على عقار بيت او فيلا او شقه وهكذا لانها مش هتتحرك من مكانها وثابته لحد الفصل فى القضيه.. الحجز التحفظى لا يشترط وجود سند تنفيذى فى يد الحاجز لان الحجز التحفظى بيكون فى كل حاله يخشى فيها الدائن على ضياع حقه زى ماقالت الماده 316 مرافعات.

الامر التحفظى بيكون بناء على امر من قاضى التنفيذ.. الحجز التحفظى يكون اقتضا لدين محقق الوجود وحال الاداء ولا يشترط ان يكون معين المقدار لأن قاضى التنفيذ يقوم بتقديرة .ليس للحجز التحفظى مقدمات تنفيذ ..يعتبر الحجز التحفظى الذى تم بمعرفة قاضى التنفيذ كأن لم يكن اذا لم يقم الحاجز خلال8 ايام من توقيعة برفع دعوى لثبوت الحق وصحة الحجز .. هذا النوع من الحجوز يظل إجراءا وقتيا إلى غاية الفصل في الدعوى أمام قضاء الموضوع. أو بالالتزام (سداد الدين).

يؤدي الحجز التحفظي إلى تجميد الأموال التي وقع الحجز عليها من خلال وضع القضاء يده عليه وبالتالي منع. المدين من التصرف فيها..ورغم ذلك فإن المحجوز عليه يظل مالكا لماله المحجوز عليه من قبل المدعى ، لان الحجز لا يؤدي إلى فقد ملكية المال المحجوز.

ثانيآ : المقصود بالحجز التنفيذى : –

هو ببساطه كده وضع المال المحجوز عليه بين ايد القضاء تمهيدا لبيعه … ومن خلال البيع هيتم توزيع الديون على الحاجزين (الناس اللى ليهم فلوس).

والحجز ده هو اول اجراء من اجراءات التنفيذ وبيقوم بيه المحضر بيروح يحجز على الحاجات المطلوب حجزها ويثبتها فى محضر وبيمضى عليه .. والحجز التنفيذى بيكون بناءا على سند تنفيذى .

الحجز التنفيذى يشترط ان يكون الدين محقق الوجود حال الأداء معين المقدار ويكون ذلك بسند تنفيذى.. وبعد الحجز بيتم اعلان المدين بالبيع لو مكانش هناك وبيتم تعيين حارس على الحاجه وممكن يكون المدين حارس على حاجته عادى بس تقريبا هو ده الفرق بينهم ان الحجز التحفظى امر وقتى والحجز التنفيذى امر وحكم نهائى .

ثالثآ : المقصود بالحجز الادارى : –

أى جهة أدارية فى الدولة تستطيع توقيع الحجز الادارى على اى شخص عن طريق التنفيذ المباشر او الحجز الجبرى باعتبار ان هذا امتياز للسلطة العامة … ولابد أن يكون أحد اطراف المنازعة جهة حكومية مثل( مصلحة الضرائب او التأمينات الاجتماعية او مصلحة الجمارك ) .. وهذا الحجز يتم دون اللجوء الى القضاء او رفع قضية حيث ان الجهة الادارية هى جهة قوة وتعتبر من النظام العام .

اذن الحجز الادارى تملكة الجهة الادارية فى الدولة وهى تتميز بمركز اعلى من الافراد اوالاشخاص .. ويحكم هذا الحجز قانون الحجز الادارى الصادر سنة 1955 .